​

Upplifðu einstakt skíðagönguævintýri um stórbrotið landslag Ítölsku Dólómítanna þar sem við ferðumst á skíðum milli fallegra fjallahótela í hjarta UNESCO þjóðgarða.

Á hverjum degi tekur við ný leið, nýtt landslag og ný upplifun — frá friðsælum skógarleiðum og víðáttumiklum hásléttum yfir í ævintýralega dali og heillandi fjallaþorp.

Ferðin sameinar hreyfingu, náttúru og lúxus á einstakan hátt. Við gistum á glæsilegum hótelum með notalegri stemningu, góðum heilsulindum og sundlaugum. Hver dagur endar með afslöppun, endurnæringu og einstakri matarupplifun.

Leiðirnar eru fjölbreyttar og hægt að velja bæði lengri og krefjandi skíðadaga eða styttri leiðir með meiri tíma til að njóta umhverfisins. Við skíðum meðal annars um hina stórkostlegu Prato Piazza hásléttu, Val Fiscalina dalinn og meðfram gömlu Dolomitajárnbrautinni að Cortina d’Ampezzo — allt innan eins fallegasta fjallasvæðis Evrópu.

Þetta er ferð fyrir ykkur sem viljið upplifa Dólómítana á einstakan hátt; ferðast milli staða á eigin afli, njóta gæða, kyrrðar og náttúrufegurðar — og vakna á hverjum morgni til nýs ævintýris.

 

​

Fyrir ykkur sem eruð búin að koma með í þessa ferð áður og langar aftur:

​

Dagana sem gist er í Toblach er tilvalið að skíða aðra dagleiðir en þær sem getið er í leiðarlýsingu.

​

1. Skíða yfir landamærin til Austuríkis og taka lestina til baka.

2. Fá stutt skutl og skíða á fræga skíðaskotsvæðinu í  Anterselva í Mittertal eða í Opertilliach í Austuríki.

​

Verð: 326.000 kr. á mann í tvíbýli

Dagsetningar  16. - 23. janúar og 23. - 30. janúar 2027

Fararstjóri: Emelía Blöndal (Milla)

​

 

Dagur 1: Keflavik – Munchen, Verona ,Innsbruck, Salzbruck - Sesto (Sexten) 

Boðið verður upp á rútuferð frá nærliggjandi flugvöllum ef farþegar eru 6 eða fleiri og keyrt  til bæjarins Sexten.  Sexten er lítill krúttlegur bær í hjarta Dólómítanna. Gist er á hóteli í Sexten með heilsulind í tvær nætur.

​

Dagur 2: Sesto - Val Fiscalina – Sesto (10 - 20 km)

Gönguskíðaleiðin okkar liggur um hinn friðsæla Fischlein-dal sem er ein fallegasta gönguleið í

Dólómítunum. Útsýnið er algjörlega magnað þar sem hrikalegir tindar Dólóítanna blasa við. Auðvelt er að lengja eða stytta daginn að vild.

​

Dagur 3: Sesto - Braies/Prato Piazza (u.þ.b. 25  km)

Við skiljum farangurinn eftir í anderi hótelisins og kveðjum Sesto. Við skíðum meðfram Sesto-ánni í gegnum þykkan greniskóg til San Candido sem er lítill bær við rætur Haunold tinda. Við höldum áfram til Dobbiaco og við skíðum framhjá Nordic Arena Skíðagöngumiðstöðinni, snæðum þar hádegismat og höldum svo áfram til fallega þorpsins Villabassa. Þar gefst fólki kostur á að taka strætó eða skíða áfram inn í  Braies dalinn. Þar hoppum við upp í rútu sem fer með okkur uppá Prato Piazza hásléttuna þar sem við gistum á ævintýralegu 4 *  hóteli með frábærri heilsulind í einstakri náttúruperlu. Gist í tvær nætur.

​

Dagur 4: Hringleið Prato Piazza (einn hringur ca. 6 km) og snjóþrúguganga

Í dag æfum við okkur og skíðum nokkra hringi í 2000 metra hæð á þessari frægu hásléttu milli fjallanna Picco di Vallandro 2,839 m og Croda Rossa d’Ampezzo 3,146. Við munum einnig fara í snjóþrúgugöngu til Monte Specie. Á góðum degi er útsýnið yfir Tindana þrjá og Dólómítafjöllin ógleymanlegt. 

​

Dagur 5: Val Casies – Villabassa/Dobbiaco(Toblach) (u.þ.b. 10 - 25 km )

Eftir morgunmat er stutt rútuferð frá Prato Piazza til Monguelfo/Val Casies. Þar skíðum við á breiðum, sólríkum dalbotninum í gegnum draumkennt vetrarlandslag, framhjá fallegum sveitabæjum. Nokkrir veitingastaðir eru á leiðinni þar sem upplagt er að stoppa og fá sér hressingu. Við höfum síðan val um að halda áfram til Monguelfo og þaðan yfir akrana til Villabassa eða Dobbiaco eða hoppa upp í strætó eða lest  og stytta áfangann.

Gist í Toblach/Dobbiaco á dásamlegu hóteli með heilsulind næstu 3 nætur.

​

Dagur 6: Villabassa/Dobbiaco – Valle di Landro/Cortina d’Ampezzo (10 - 25 km)

Við hefjum gönguna við gönguskíðamiðstöðina Nordic Arena, þar sem besta gönguskíðafólk heims keppir á hverju ári um mikilvæg stig á heimsbikarmótinu. Við fylgjum járnbrautarlínum gömlu Dolomitajárnbrautarinnar inn í Landro-dalinn, fram hjá Dobbiaco vatni og höldum áfram að útsýnisstað yfir hina frægu Þríhnjúka. Þaðan höfum við möguleika á að halda áfram til skíðabæjarins Cortína d’Ampezzo. Heimferðin er með almenningssamgöngum.

​

Dagur 7: Villabassa/Dobbiaco - hvíldardagur

Í dag höfum við val um að hvíla okkur, heimsækja bæina Brunico eða Cortina, eða fara stuttan

gönguskíðahring í kringum fræga vatnið Toblacersee/Lago di Dobbiaco. Einnig væri hægt að fara í gönguferð í nágrenni Villabassa/Dobbiaco eða kaupa sér gönguskíðakennslu. Gist í Dobbiaco.

​​

​

Dagur 8: Brottför

Rúta á Flugvöll  , þaðan sem flogið er til Keflavíkur.​​

​

Innifalið:

• Hálft fæði (morgunverður og kvöldverður)

• Gisting í tvíbýli á góðum hótelum í 7 nætur

• Undirbúningsfundur

• Leiðsögn

• Farangursskutl

• Rútuferð frá flugvelli til Sesto á degi 1 og til baka á flugvöll á degi 8

• Strætó kort og kort í skíðasporið

• Aðgangur að heilsulindum á Hótelunum.

​

Ekki innifalið:

• Flug 

• Hádegisverðir

• Drykkir

• Leiga á búnaði (hægt er að leiga búnað)

• Forfalla- og ferðatrygging.