​

Milla

Emelía Blöndal eða Milla eins og hún er alltaf kölluð er önnur af stofnendum Millu og Krillu ferða. Hún er fædd og uppalin á Seyðisfirði í faðmi brattra fjalla þar sem sem hún æfði og stundaði skíði. 

Eftir langa reynslu af gönguferðum í óbyggðum fór hún hún í landvarðarnám og starfaði sem Landvörður á Austursvæði Vatnajökuls. Síðan lá leiðin í fjallaleiðsögunám þar sem hún fann að þetta var draumastarfið. Eftir að hún hóf störf sem leiðsögumaður hefur hún bætt við sig ýmsum réttindum eins og jöklaleiðsögn (jökla 1), skyndihjálp í óbyggðum (WFR), meiraprófi og fleiru. 

Milla elskar flestar gerðir af útivist og veit ekkert betra en að vera úti í náttúrunni, þá sérstaklega með góðu fólki. Hún þvælist um fjöll og firnindi allan ársins hring á skíðum, hjóli eða tveimur jafnfljótum. Henni finnst ekkert skemmtilegra en að kynna fólki fyrir náttúrunni og sjá það eflast og fara út fyrir sinn þægindaramma í útivistinni.

​

Krilla

Kristín Jóna, stundum kölluð Krilla er ein af stofnendum Millu og Krillu ferða.  Hún er fædd og uppalin í Keflavík, menntaði sig sem snyrtifræðingur og vann við það til margra ára, ásamt öðrum störfum sem tengjast því. 

Hún fór óvænt í sína fyrstu gönguferð upp á Hvannadalshnjúk og þar fékk hún bakteríuna og  eftir það eyddi hún öllum sínum frítíma í að ganga, skíða eða hjóla upp um fjöll og firnindi.

Hreyfiþörfin varð að atvinnu þegar hún kláraði fjallaleiðsögunámið árið 2015 og fór að vinna hjá Íslenskum Fjallaleiðsögumönnum.  

Hún hefur  bætt við sig ýmsum réttindum t.a.m. Fit- Pilates sem hún hefur kennt síðastiðin 10 ár, Jóga, Markþjálfun, skyndihjálp (WFR) og meirapróf.

Krilla elskar að vera úti í náttúrunni og að kynna fólki fyrir fallega landinu okkar. Það sem gefur henni mest er að eiga þátt í því þegar fólk uppgötvar að það getur miklu meira

en það heldur og að sjá það fara langt út fyrir þægindarammann. Þá gerast töfrarnir !

​

Sigrún

Sigrún Hallgrímsdóttir er uppalin á Ólafsfirði innan um brattar hlíðar Tröllaskaga. Þar kviknaði útiveru- og göngu bakterían sem hefur átt hug hennar allan, alla hennar tíð. Hún byrjaði  snemma að stunda gönguskíði og hefur ferðast vítt og breytt um landið á gönguskíðum meðal annars þverað hálendið. Hringferðin umhverfis Snæfell á ferðaskíðum er ein af hennar uppáhalds ferðum.

Grunninn að sinni formlegu fjallamennsku menntun hlaut Sigrún við þjálfun hjá Hjálparsveit skáta í Reykjavík þar sem skyndihjálp og björgun í óbyggðum vakti mestan áhuga enda er hún sérfræðingur í hælsærum á fjöllum.  Hún bjó í Noregi í nokkur ár þar sem hún menntaði sig tómstundafræði. Meðan á dvölinni stóð ferðaðist fjölskyldan mikið á skíðum, hjólum og fótgangandi “ut på tur” eins og sannir Norðmenn gera. Sigrún hefur unnið við fararstjórn til fjölda ára, jafnt á vetri, sumri, vori og hausti og henni finnst ekkert eins dásamlegt og að sjá fólk smitast af öræfabakteríunni.

​

Linda

Linda Udengård er gönguleiðsögumaður og ferðamálafræðingur.  Hún hefur unnið sem stjórnandi í skóla- frístunda og menningargeiranum til fjölda ára. Linda hefur flækst um landið frá því að hún var smáskotta og finnst jafn skemmtilegt að ferðast um hvítar auðnir eins og grænar hlíðar. Jeppar og hjól eru brúkuð í bland við skíði og gönguskó. Linda á það til að gleyma sér með nefið ofan í sverðinum við að skoða blóm eða grjót. Hún er hættulega áhugasöm í útivistarbúðum og finnst þær skemmtilegustu dótabúðirnar.

„Ég elska að eiga hlutdeild í upplifun fólks á náttúrunni og sögunni, það jafnast ekkert á við þau hughrif“

​

Maddý 

Margrét Blöndal er ferðamálafræðingur og leiðsögumaður fædd og uppalin á Seyðisfirði. Hún lærði ferðamálafræði í París og hefur unnið við skipulagningu ferða um Ísland fyrir erlenda ferðamenn í ótal ár. Maddý finnst fátt betra en gönguferðir í óbyggðum en þar á eftir koma skíðaferðir í Ölpunum. Hún kemur sterk inn þegar þarf að útfæra hugmyndir og gera þær að söluvöru. Hún er líka  tilbúin á kantinum þegar það vantar aðstoð við eldamennsku ofl. í ferðum.